ارجل راجل فى مصر

متهيئلى كلنا نعرف احمد فؤاد نجم
جايبلكم انهاردة بعض اعماله يارب تعجبكم


عشان انت مصرى


عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى

عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك


ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله

واوتوبيس فرامله عايزالها وصله
وتوك توك ده تايه ومحتاج لبوصله

بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامل لك قلق
بيشكى تقول له روح اندعق


ومخك خلاص من الصداع اتفلق


هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهماهاتيت


عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف

مش انت اللي مصري؟؟؟
جتك القرف
ـــــــــــــــــــــــــــــــــــــــــــــــــــــ



الفول واللحمة


عن موضوع الفول واللحمة
صرح مصدر ال مسئول
ان الطب اتقدم جدا
والدكتور محسن بيقول
ان الشعب المصري عموما
من مصلحته يقرقش فول
حيث الفول المصري عموما
يجعل من بني ادم غول
تاكل فخدة في ربع زكيبة
تسمن جدا تبقي مهول

ثم اضاف الدكتور محسن
ان اللحم دي سم اكيد
بتزود اوجاع المعدة
وتعود على طولة الايد
وتنيم بنى ادم اكتر
وتفرقع منه المواعيد
واللي بياكلوا اللحمة عموما
حيخشوا جهنم ده اكيد

يا دكتور محسن يا مزقلط
يا مصدر يا غير مسئول
حيث ان انتوا عقول العالم
والعالم محتاج لعقول
ما راي جنابك وجنابهم
في واحد مجنون بيقول
انتوا سيبونا نموت باللحمة
وانتوا تعيشوا وتاكلوا الفول

ما راي جنابك وجنابهم
مش بالذمة كلام معقول !! [/color]
ــــــــــــــــــــــــــــــــــــــــــــــــــــــــــــــــ


هما مين و إحنا مين ...

كلمات الشاعر : أحمد فؤاد نجم
غناء : الشيخ إمام


هما مين و إ حنا مين .. ؟

هما الأمرا و السلاطين ..

هما المال و الحكم معاهم ..

و إحنا الفقرا المحرومين

حزر فزر شغّـل مخك

شوف مين فينا بيحكم مين ؟!!

..............

إحنا مين و هما مين ..

إحنا الفعلا البنايين

إحنا السنة و إحنا الفرض

إحنا الناس بالطول و العرض

من عافيتنا تقوم الارض ..

و عرقنا يخضر بساتين

حزر فزر شغل مخك

شوف مين فينا بيخدم مين ..؟؟!!

................

هما مين و إحنا مين ؟؟

هما الامرا و السلاطين

هما الفيلا و العربية

و النساوين المتنقية

حيوانات استهلاكية

شغلتهم حشو المصارين

حزر فزر شغل مخك

شوف مين فينا بياكل مين ..؟؟!!!

....................
إحنا مين و هما مين

إحنا قرنفل على ياسمين

إحنا الحرب : حطبها و نارها

و إحنا الجيش اللي يحررها

و إحنا الشهدا بكل مدارها

منكسرين أو منتصرين

حزر فزر شغل مخك

شوف مين فينا بيقتل مين ..؟؟!!!

................


هما مين و إحنا مين

هما الامرا و السلاطين

هما مناظر بالمزيكا

و الزفة و شغل البوليتيكا

و دماغهم طبعاً استيكا

بس البركة بالميازين

حزر .. فزر شغل مخك

شوف مين فينا بيخدع مين ..؟؟؟!!!

.....................

هما مين و إحنا مين

هما الامرا و السلاطين

هما بيلبسوا أخر موضة

و إحنا بنسكن سبعة في أوضة

هما بياكلوا حمام و فراخ

و إحنا الفول دوخنا و داخ

هما بيمشوا بطيارات

و إحنا نموت بالاوتوبيسات

هما حياتهم بامب جميلة

هما فصيلة و إحنا فصيلة


حادي يا بادي يا عبد الهادي

يا اللي عليك قصد الغنوادي ( الغنوة دي أو هذه الاغنية )

لما الشعب يقوم و ينادي

يا إحنا يا هما في الدنيا دي

حزر فزر .. شغل مخك

شوف مين فينا حيغلب مين

ــــــــــــــــــــــــــــــــــــــــــــــــــــــــــــــ