لحظة خوف

لحظة خوف
فيها تشوف
كلّ العالم واقف ضدَّك
و انت لوحدك
فيها تحس الكون اتغيّر
كل قريّب منك خاين
شِعْرك
اسمك
أهلك
صاحبك
حتى حبيبتك
تلقى الدينا بترمي همومها
علشان تقتل لحظة فرْحك
تلقى البحر بيرفض تجري
ترفع فوق الموجة شراع لأجل ما تهرب إنت و حلمك
٭٭٭٭٭٭
لحظة ...!!!
لحظة تشوف نفسك متقيَّد
بين جدران العمر الضايع
عاجز إنّك تكسر سجنك
نفسك تصرخ و الصوت يعلى
يوصل عند الشمس الغايبة
علشان ترمي الضّي ف وطنك
بس تلاقي الصوت مسجون تعرف إن العتمة دي قدرك
و إنّ الحزن هيصبغ زمنك
٭٭٭٭٭٭
لحظة ..!!
لحظة تحس بخـوفك منّك
تبعد عنّك
تبقى عدوَّك
تبقى المجني عليه و الجاني
تكره نفسك
ترفض شكلك جوَّه مرايتك
لما تشوف الحزن بيسكن
جوَّه عيونك مش بيفارقك
٭٭٭٭٭٭
لحظة ...!!!
لحظة تشوف الريح بتقرب
تاخدك فيها و ترميك أبعد
تلقاك وحدك وسط الغربة
تجري تدوَّر .. تجري بسرعة
فين اللمـة
فين الصحبة
تفهم إنك عايش وحدك
و ان الجاي من زمنك .... أصعب