لو لم اكن مصريا كنت اتمنى ابقى حاجه تانية

لو لم اكن مصريا كنت اتمنى ابقى حاجه تانية

الله يرحمك يا عم مصطفى كامل باشا .. لو كنت تعيش معنا هذا الزمان لما كنت زعقت بعلو صوتك وقلت كلمتك الشهيرة
لو لم أكن مصريا لوددت أن أكون مصريا

ما الذى يدفع أي إنسان أن يعتز بإنتمائه لبلده؟؟ ما الذى يجعل واحد مثل حليم يشدوا بكل فخر
أحلف بسماها و بترابها..أحلف بالقمح وبالمصنع..أحلف بالمدنا و...الخ
هذا الإعتزاز و ذلك الفخر لابد أن يكون له سبب ..وسببه في اعتقادي هو الحب..أكيد الناس دي بتحب مصر..بتموت فيها..بتعشق سماها وهواها وترابها وناسها..والذي منه
لكن ليه ؟؟ ليه الناس دى بتحب مصر؟؟ ليه الست كانت بتقول

مصر التى فى خاطرى و فى دمى .. أحبها من كل روحى و دمى

مفيش حب كده من الباب للطاق ..متقوليش عشان اتولدت مصري يبقى لازم تحب مصر وتموت فى دباديبها..متقوليش حب من أول نظرة..لأن أكيد تاني و تالت نظرة حتخليك تغير رأيك..متقوليش حب من طرف واحد .. يعنى الطرف التانى يديك بالجزمة القديمة وانت بتصرخ .. بحبك بحبك

فى رأيي أن الحب علاقة متبادلة بين طرفين..مشاعر ماشية فى اتجاهين..يعنى لازم البلد تحبك عشان تحبها ..وبسلامتها البلد دى تحبك ازاى ؟؟؟ ..أقولك
تحبك يعنى ترعاك .. تهتم بيك .. بالبلدى كده تعبرك .. تحسسك إنك بني آدم لك قيمة وليك رأى..تعترف أن ليك حقوق زى ما عليك واجبات

من حقك تأكل لقمة نضيفة من غير مبيدات ولا مسرطنات ولا تقاوي فاسدة ..من حقك تاكل رغيف عيش من غير مسامير ولا صراصير ولا بلا أزرق
من حقك تتنفس هوا نضيف من غير هباب ولا أطران ولا دخان مصانع وكبريت ورصاص وسخام أسود منيل بستين نيله
من حقك تلاقى مواصلة تركبها من غير بهدلة و شحططه ومرمطة وتزنيق و تلزيق وبلطجة وقلة أدب واللي مش عاجبه الباب يفوت جحش
من حقك تلاقى شغلة شريفة من غير ذل ومهانة وفوت علينا بكرة يا سيد .. من غير كوسة ومحسوبية وأبجني تجدنى وسكة أبو زيد كلها مسالك
من حقك لو عييت تلاقى حتة تتعالج فيها بكرامتك وتتعامل كإنسان محترم مش كأنك متسول جاي تشحت من الدكتور اللي أصلاً قرفان من نفسه ونفسه يديلك حقنة هوا عشان يخلص من أمثالك الأوباش الجرابيع
من حقك تلاقى حد يجيبلك حقك لما يتنطط عليك حتة عيل شبه البرص مش باين من الأرض ويقولك..أنت مش عارف أنا ابن مين يا ابن ال .... ويبقى نهار أبوك أسود لو طلع أبوه ظابط و لا وزير و لا......... واللي له ضهر مينضربش على بطنه
من حقك لو دخلت قسم الشرطة تخش بثبات بدون رعب من غير ما تبص حواليك خوفا من قفا طاير أو شلوت ضل الطريق أوروسية تبحث عن ضحية أو شتيمة عابرة للقارات ده غير السحل و النفخ وهتك العرض و السفالة وقلة الأدب و المواطن مجرم وابن ستين ... حتى تثبت براءة اللي جابوه ... ويا ويلك يا سواد ليلك لو كانت دقنك منبته انشالله تقاوى شعر .. يبقى انت ارهابي .. واشحن على أمن الدولة لحد ما يبانلك صاحب.. وإن بانلك صاحب يبقى نهار أبوه أسود هو كمان

من حقك تتفرج على تليفزيون بلدك تحس بالفخر..تشوف مدارس بتتبنى ومصانع بتشتغل و كباري بتتفتح و مستشفيات بتتجدد و مدن بتتعمر وشباب زى الورد بيشتغل و يبني ويعمر ويضحي بعرقه ودمه.مش تشوف بلد بتتسرق..وعبارة بتتحرق..وقضاة بتنضرب..وصحفيين بتتسحل..وأسعار كل يوم بتولع..والحرامية اللي سرقوا البلد إما في أوروبا أو في مارينا..وحكومة مش فاهمة حاجة فى أي حاجة ورئيسها بيقول الشعب لازم يرضع الديمقراطية بالبزازة..ومجلس شعب دايماً موافق وهو نايم بيشخر..وأكبر راس فى البلد مرعوب وخايف يحط إيده فى بق الأسد..مستني لما الأسد يهبش ....... مش إيده..والكتكوت ننوس عين ماما متصدر فى الفاضية و المليانة ونافخ ريشه عشان يورينا إنه دكر و بيعرف يكاكي زى بابا

يا ترى بعد كل ده لسة مش فاهمين ليه الشباب بيسيب البلد و يهج؟؟ !! يا ترى لسة مش فاهمين ليه الطلبة ما صدقوا حطوا رجلهم فى أمريكا ومحدش شافهم تانى ؟؟..لسة مستغربين ليه كرم جابر و بوجي بيدوروا على الجنسية الأمريكية؟؟..لسة بتسألوا فين أحمد زويل و فاروق الباز و مجدى يعقوب..وغيرهم كتير و كتير؟؟...... يا ترى كل دول خونة و مجرمين و معندهمش و لاء وانتماء؟؟!!

ياترى يا عم مصطفى كامل باشا لو كنت عايش معانا .. كنت حتقول إيه

لا انا ضدك تماما

اي نعم الفساد داير في البلد

وكل حاجة باظت

بس انا عكس المقولة دي تماااااااااااااااما

وانا اقولها باعلي صوتي

لو لم اكن مصريا

لودت ان اكون مصريا

ومعلش هعلق علي بعض كلامك

من حقك تأكل لقمة نضيفة من غير مبيدات ولا مسرطنات ولا تقاوي فاسدة ..من حقك تاكل رغيف عيش من غير مسامير ولا صراصير ولا بلا أزرق

طيب ده العيب علي ايه

غلطة او تقصير شخص او اتنين

نظلم الحكومة بالكامل

سواء كان مفتش التموين ولا العمال اللي في الفرن

من حقك تتنفس هوا نضيف من غير هباب ولا أطران ولا دخان مصانع وكبريت ورصاص وسخام أسود منيل بستين نيله

طيب وايه العمل دلوقتي
الحكومة لو هتخالف كل من يلوث البيئة
البلد كلها هتتخالف
العربيات كلها هتتخالف
والمصانع كلها

علشان منصرفش كام جنية علشان نحط الاجهزة اللي بتفلتر الهوا

يلا القصد

من حقك تلاقى مواصلة تركبها من غير بهدلة و شحططه ومرمطة وتزنيق و تلزيق وبلطجة وقلة أدب واللي مش عاجبه الباب يفوت جحش

الحمد لله
انا ريحت بالي وجيبت موتسيكل

من حقك لو عييت تلاقى حتة تتعالج فيها بكرامتك وتتعامل كإنسان محترم مش كأنك متسول جاي تشحت من الدكتور اللي
أصلاً قرفان من نفسه ونفسه يديلك حقنة هوا عشان يخلص من أمثالك الأوباش الجرابيع

متفكرتيش بالدكاترة وقرفالدكاترة وعلاجات الدكاترة الغلط في غلط

انا دلوقتي اؤكد اني بقت عندي عقدة كل دكاترة مصر

مش اخد علاج غلط في غلط والحالة تزداد
وانزل الاسماعلية علشان دكتور سمعته وبيراعي ربنا في عمله

منهم لله

من حقك تلاقى حد يجيبلك حقك لما يتنطط عليك حتة عيل شبه البرص مش باين من الأرض ويقولك..أنت مش عارف أنا

ابن مين يا ابن ال .... ويبقى نهار أبوك أسود لو طلع أبوه ظابط و لا وزير و لا......... واللي له ضهر مينضربش على بطنه

انا مش بكره في الدنيا دي اكتر من الناس دي

وانا مش بتفرق معايا الحاجات دي
والله لو مين قدامي مهسيب حقي

من كام يوم جالي ظابط يصلح تليفونه
وانا عارف نفسي لما بيكون المزاج مش رايق
100% التليفون هيبوظ

فبقوله هتسيبة لبكرة
قالي اصل ومش اصل ومش عارف بتاع مين
رتبة كبيرة يعني
قولتله والله مينفعش لو مش كدا انزل بيه العريش
قالي خد كلمه اهو
قولتله مش بكلم حد
لو كلمته هكسفة
بلاش احسن
المهم كلمته وكسفته
وخد بعضة ومشي

من حقك لو دخلت قسم الشرطة تخش بثبات بدون رعب من غير ما تبص حواليك خوفا من قفا طاير أو شلوت
واحد ساكن ورا القسم عاوز يتعمل فيه الحاجات دي

ليه سعاد

هنرحلهم من البلد يا بابا

انت مش عارف بتكلم مين

!!

؟

يا ترى بعد كل ده لسة مش فاهمين ليه الشباب بيسيب البلد و يهج؟؟ !! يا ترى لسة مش فاهمين ليه الطلبة ما صدقوا حطوا رجلهم فى أمريكا ومحدش شافهم تانى ؟؟..لسة مستغربين ليه كرم جابر و بوجي بيدوروا على الجنسية الأمريكية؟؟..لسة بتسألوا فين أحمد زويل

البلد نفسها مش فيها امكانية علشان يتخرج منها زويل جديد او ما شابه

مفيش موارد
مفيش فلوس
مفيش حاجة خالص

تحياتي

الاول
اتوجه ليك بالشكر
من اعماق اعماق قلبى
لعدة اسباب
اولها قرائتك الجيدة للموضوع
تانى حاجه المناقشة الرائعه ليك
تالت حاجه
ودى الاهم انك مصرى ومهما حصل مش هتتخلى عن انتمائك
بص يا هيما
كل كلامك هختصرهولك فى نقطة صغيرة
وارجو انها توصلك بسهولة
لو الاختيار من الاول صح
كانت هتترتب عليه حجات سليمة
تقدر تقولى ليه مبارك مسك يوسف والى وزارة الزراعه من زمن بعيد
علشان كان مغطى عليه حجات
وماسك عليه حجات
شاله بالعافية من مكانة
يوسف والى بيمتلك دلوقتى اكتر من 25% من مساحات المزارع فى محافظة البحيرة
تانى حاجه بالنسبة للدعم والتموين
الوزارة نفسها فاسدة
تالت حاجه يا هيما
انا لسا الشرف انى مصرى واقولها بأعلى صوتى لو لم اكن مصريا
لوددت ان اكون مصريا
لكن لايشرفنى ان اكون تحت طائلة حاكم مثل هذا ولا حكومة مثل هذه
تحياتى لك اخى الكريم
مشكور على احلى واجمل رد ومناقشة
رايتها فى حياتى

» اعلاناااااات................خش و ابقى قابلنى لو اشتريت حاجة
» اتمنى لو ترجعلـــــــــــــــــــــــــــى
» مكت شد يده اوى اتمنى تعجبكم
» اتمنى تقرب
» نكت تجنن اتمنى تعجبكم