بعد التحية وبعد السلام

بعد التحية و بعد السلام ...
ازيك يا ريس و ازي المدام
وقبل ما أنسي أنا بشكرك
علشان يعني بتسأل علينا
وربنا ياريس يقدرك
ويخليك كمان لينا
شكرا ياريس
شكرا ياريس علي كل حال
الشعب كويس وفل وعال العال
الشعب واكل معندوش مشاكل
والشباب شغال
واللي يقولك فيه بطالة
والمواصلات مش شغالة
والحكومة بقي حالها زبالة
ولازم تتشال
ابعتلهم بسرعة ولاد الحلال
من أفاه هيشيلوه
وهيكرموه ويشغلوه
في أبو زعبل يكسر جبال
أهو أحسن من قاعدة القهاوي
ويقعد يقول كوسة ورشاوي
ويقول عليك كلام بطال
وفي الختام مني السلام لبطلنا الغمام
بطل الوعود وكتر الكلام
وآدي القصيدة أنا ما بخفش وهفضل أقول
كلمة الحق عليها مسئول
إن الريس راجل طيب
وبشعبه دايما مشغول
مشغول بفلوسنا
في سويسرا يحوشهالنا
وفي بنوك سرية يشيلهالنا
نفسه يأمن مستقبلنا
شوفتو إزاي بقي قلبه رحيم
عنده إيمان وضميره سليم
بيجوعكو لجل تخسو
أي شعب محتاج لرجيم
من جهلكو بتقولو بطالة
وإن الأحوال مش شغالة
الراجل نفسه يريحكم
هي الراحة تبقي عوالة
أما حكاية المنتجعات
ليه بتسموها معتقلات
ليه الظن وسوء النية
نفسه يفسحكو يابهوات
والله انتو ظالمين الراجل
ضيع عمره ومين يستاهل
حتي الأكل بياكله بدالنا
طالع واكل نازل واكل
بقي بعد ده كله ماله الريس
طبعا انتو عارفين من غير ما أقول
أصل اللي جوانا أكبر من الكلام
وخلص الكلام وما عدش ليه لازمة
تعبنا من اللي بيحصل حوالينا
والباقي انتو عارفينه

ممممممممممممم
هي كلماتها حلوه قوي
بس انت مصور الريس
كانه شيطان
ليه بس كده
يعني انت مش شفت ليه حاجه حلوه
تكرمه بيها او تفكر فيها
كل اللي شايفه هو الغلط
انا صراحه مش شايف كده
انا شيفاه راجل كويس وعظيم
حتي لو محدش شايف كده غيري
انا بحترمه جدا وكشخصيه بحبه

اختلاف الراي لا يفسد للود قضيه
وتسلم ايدك بجد
جميله فعلا

مشفتلوش حاجه حلوة من يوم ما وعيت على الدنيا غير حاجه واحده
وعوده
يعنى بيدينا الامل
امل اسود على دماغه
ربنا يهديكى وينور بصيرتك يا ضحكة
مرورك اسعدنى كتير
وزى ما قلتى
الاختلاف فى الرآى لا يفسد للود قضية

والله يا عبد العزيز
لو الكتابات دى كلها من ابداعك انت
يبقى الواحد فعلا يرفعلك القباعه
كلام تحفه
والايام اللى احنا فيها هتخليك تكتب احلى واحلى

والله يا ساندى مش كلة
فيه كتابات ليا
وفيه لاصحابى
وفيه لناس معرفهمش
بس المهم
انى قلت كل الكلام اللى كان نفسى اقوله
فى المعتقل
قولته وبقلب ميت قدام الظباط والدنيا كلها
والحمد لله
انتصرنا

تسلم ايديكم
الحمد لله
ربنا يكتب الخير لمصر والمصريين
اتسجلت خطر ف العتقل
حمد لله ع السلامه

» وبعد الدرس نتعلم
» تحيه طيبه وبعد.....
» تحيه طيبه وبعد.....
» كلام فى الحب......... قبل وبعد الفراق
» وبعد دراسه فى عالم المطبخ طريقه تحضير الشاورما