اه يا ميدان التحرير

عمرك ما هتهونى يا مصر
ياللى تاريخك كله نصر
والمرة دى طلعت ولادك
يكتبوا شهادة ميلادك
قاموا بثورة للتغير
من ميدانك فى التحرير
التحرير من الفساد.. قاموا الولاد
كلهم جم فى المعاد.. طالبين امان
طالبين تغير فى كل مكان.. جالهم شفيق ومعاه سليمان
قلنا صحيح شباب رجاله.. حاربوا فساد وحاربو بطاله
طب والحاله.. ظهرت قنوات تفسيرها زباله
ما صدقوا ونزلوا قواله..يسيبوا الحقيقة وياخدوا النخاله
ونسوا مصر الاصاله...وقفنا معاهم فى كل حاله
حركه 25 يناير... دايره طلعت منها دواير
أول دايره بتلخبطنى ...راحوا فين رجاله الوطنى
والدايره التانيه... حاجه عارضه
رفرفرت كل المعارضه...طيب اشمعنى النهارده
جابوا الجون ...بس المرمى من غير عارضه
صابره يا مصر يا أم الدنيا
حاضنه ولادك كل ثانيه
ملناش غيرك أم تانيه
محتاجين ديما حنانك
نعيش ازاى من غير أمانك
مهما قسيت عليكى إبنك
هارجع تانى احتاج لحضنك
وزى ما فرحتى بشبابك
ملعون كل اللى هيهز بابك
أو فى يوم يطلب غيابك
الخاين ما يعيش فى رحابك
الخاين يرضى بعذابك
للأسف مرضعش منك
لو فى يوم فكر يذلك..أو يضلك..ما يستاهلش ينام فى ضلك
ملعون البطن اللى شالت خاين.. يزرع خراب بدل الجناين
احكى يا عبد المنعم يا رياض..ياللى فى ميدانك الدم فاض
حرب تعرف بين مين ومين..بين ولادك المصريين
كانوا طالبين التغيير..ضربوا بعض فى التحرير
والحكومه وافقت ع التعديل.. وراح الشباب وجاله بديل
الكتاكيت صبحت خرتيت.. والاموات صحوا م التوابيت
شافوها والعه جابوا كبريت وفى كل شاشه طلعوا العفاريت
كلمتك يا مبارك خليتنى بكيت .. وكل واحد له حواديت
وكلامهم زى الالغاز...الكل كان صاحب إنجاز

بعد مكان ماشى بعكاز
كنتوا فى جره طلعتوا لبره طلعه كبيره
يا كدابين يا منافقين زى الجزيره
كل واحد قال هاخد وضعى ..اسامه غزالى ومعاه البرادعى
ربنا يحاسبكم من غير ما ادعى
واللى اسمه ضياء رشوان... كنت فين وفى أى مكان؟
وبنختمها وبنبدأها بالإخوان..نفسى هدفكم لينا يبان
أه يا دماغكم أه يا نظامكم أه من تفكيركم
توقيت مظبوط وكلام محدود زى كبيركم
أه يانا منكم بس قولولى مين مولكم
أصل قناة العالم منكم ..القرأن شريعتكوا ودينكوا
أه عرفينكوا...بس القسوه ليه فى يمينكوا
مش شايفين....أطفال فى بيوتهم خايفين
مش عارفين....بسببكم الناس عاطلين
لو مشى مبارك....قاعدين
نجيب سليمان ...برضك قاعدين
نغير ماده نغير عشرين برضك قاعدين
نغير شعب نحل شورى برضك رافضين
نمشى احنا ومعانا مبارح أظن دا أجمل تغير
يا اما نستأذنكوا تمشوا وتاخدوا ميدان التحرير

كتابه أ/ مصطفى فتحى
درش

الله يا ساندى
تسلمى على نقلك المميز
وفكرك الجميل تجاه اخواتك فى الميدان
كان نفسى اشوف هناك حد من اصحابى فى المنتدى
كان بجد نفسى تبقى شبابية بجد
لكن قدر الله النصر
وما شاء فعل
تحياتى لكى يا ساندى

نقلى مين
دى كتابه والدى

والله انا كان تفكيرى غيركم تماما
بس اتغير الحمد لله
وبقى احسن

والدك الله اكبر
يعنى والدك احد الثوار اهوه
امال طالعه لمين بس يا ساندى
الله يرحمه بيرم التونسى لما قال
يامصرى وانت اللى هممنى من دون الكل
نمت والعالم فايق قوم
بص وطل

» مشهد رأسي من ميدان التحرير