مـَ دام الحزن متقدَّر

و لا بسأل
طريق الحزن متقدَّر
و فين مـَ مْشي بشوف أكتر
و لو هفَّت بأيَّامي نسايم فرْح قدامي
ألاقى الحزن مستني
و يبعد فرحتي عنِّي
و يرمي الصعب ف الرحلة عشان الحلم يتدمَّر
و تضربني
رياح الغدر يا قلبي
و بتكسَّر
تلملمني ... بقايا الصبر تجمعني
تشجَّعني
و صوتها ف الفضا يزعق
و بيقلِّي
مـَ عمر الحزن يوم يقدر يرجَّعني
و الاقي خطوتي الأولى صحيح سهلة
و بتشجَّع و اعدِّيها
ألاقي الحزن بيسبني أفوت فيها
عشان أفرح
و أتصوَّر
بإني ف يوم صحيح هوصل
و أحلامي .. على غدر الزمن تقدر
و لمَّا الحزن يلمحني
بعدِّي خطوتي التانيه
مـَ يستنَّى
و يكسرني
و قلبي صعب يتحمَّل
عشان الجرح ف الآخر صحيح أصعب من الأول
و يتلوَّى على أرض الألم عمري
و عُقْد الفكر يتفتت
و يتْبعتر
و أيامي بقت خردة
و لا فارقة
و زي ما شفت ف امبارح هشوف بكره
مفيش مكتوب بيتغيَّر
و تبقى دنيتي غربة ... و انا جوَّه الوطن ساكن
و ادوَّر مين تكون صحبة ..؟
مـَ الاقي شخص يتآمن
و الاقي دمعتي فرحة ... مـَ بين الندل و الخاين
و تستفسر ..!
بقايا الصبر من تاني
على خطوة أعدِّيها
أجاوبها و صوتي ف الفضا يدبح أمانيها:
( مـَ دام الحزن متقدَّر مـَ عمر الصبر يوم يقدر)