موضوع قابل للنقاش

بداية فيه ناس كتير مختلط عليها الامر بين المجلس العسكرى والجيش
وان كل ما المجلس العسكرى يتجاهل مطالبنا او يعمل حاجة ما تعجبناش نقوم قايلين على طول الجيش ضدنا والجيش عمل والجيش سوا فى حين ان اللى عمل وسوا هوا المجلس الاعلى للقوات المسلحة أو المجلس العسكرى وليس الجيش

دى نقطة مهمة لازم ننتبه لها فى كلامنا دايما لانها بتصنع حالة احتقان ما لهاش اى سبب حقيقى بين الشعب والجيش ولا يستفيد منها الا المجلس العسكرى لانها تعطى دعم غير حقيقي لقراراته من الجيش بينما اغلب الجيش معنا فى نفس الخندق
المتحكم فى الامور حاليا هو المجلس العسكرى وهو شئنا ام ابينا من بقايا النظام القديم
وذا فيه حد بيقول بالعكس ان الناس دى مع الثورة لانهم كانوا ضد التوريث
باقول له ان النظام القديم ليس مختزلا فقط فى موضوع التوريث وان كان كتير نطوا فى مركب التوريث وهوا مش على كيفهم لان مصالحهم مرتبطة ببقاؤهم جزأ من النظام القائم
نقطة اخرى فى منتهى الاهمية
وهى ان كثيرا ان لم يكن كل الموجودين فى المجلس مرتبطين ارتباط كبير بامريكا اللى اكيد من البداية مش واقفة سلبية او بتتفرج بس زى ما بيتهيأ لنا كلنا
لأ دى شغالة فى السيناريو اللى احنا عمالين نتمخمض فيه بقالنا اكتر من اسبوعين بعد التنحى من قبل ما مبارك اصلا يتنحى واللقاءات اللى كانت شغالة اثناء الثورة كانت من اجل ترتيب الاوضاع ورسم السيناريو اللى هيمشى بعد سقوط مبارك لانهم كانوا متأكدين انه ماشى ماشى
وطبعا مش محتاج اقول ان لا امريكا ولا اسرائيل من مصلحتهم ان يبقى فيه ديموقراطية بجد فى مصر او ان مصر تستعيد دورها لان ده هو الخطر بالنسبة لهم
ومخططات امريكا للسيطرة على الثورة تتعدى الجيش والنظام القديم اللى بيحاول يستمر تتعداهم الى محاولة السيطرة على الثورة من داخلها عن طريق رجالها فى المعارضة الرسمية والمتأمركين من الكبار والشباب على حد سواء واعادة تكوين شعبية لبعض من فقدوها الفترة الماضية وتابع التركيز الاعلامى بيبقى على مين وانت تعرف انا قصدى مين
وانا بقول التركيز الاعلامى وليس الظهور -
وموضوع الاحتقان اللى حاصل دلوقتى بين الناس الثوار بجد وما يصطلح خطأ بالجيش هو حالة يتعمد صنعها المجلس العسكرى عشان لما الامور تخرج من ايديه يبقى فيه مبرر للسطو على الثورة واسكات الاصوات اللى تتكلم وتطالب الجيش بتنفيذ تعهداته ومفيش مانع من سجنهم واغتيالهم معنويا ان لم يكن فعليا
ولا تتصور ان الطريقة اللى بيتصرف بيها المجلس العسكرى دى هما مش عارفين نتايجها بس هما متصورين ان كل شئ تحت السيطرة زى ما كان اللى قبلهم بيفكر وهو ده ان شاء الله اللى هيفشل كل مخططاتهم
اما بالنسبة لموضوع تخوين الجيش اللى البعض بيثيره فده زى ما قلت نتيجة عدم فصل البعض بين الجيش والمجلس العسكرى وانا ضد التخوين اصلا للمجلس العسكرى لان فيه احتمال ولو ضئيل انه يكون بيدورعلى المصلحة من وجهة نظره
اما شفيق فانا بدأت احس ان بتوع المجلس العسكرى سايبينه صدادة عنهم بدل ما يمشى وتبقى المواجهة معاهم مباشرة
هما لو عايزين يمشوه مش هيعرفوا ؟؟!!
ولو عايزين يظبطوا الشرطة وينزلوها مش هيعرفوا ؟؟!! اكيد بس هما عايزينها كده لاسباب كتير
كمان موضوع الضرب يوم الجمعة 25 /2 ده كان اختبار لردة الفعل عشان يعرفوا هيا قد ايه ويحاولوا يسيطروا عليها المرة اللى جاية
موضوع البلطجية اللى كانوا مندسين ده بيفكرنى باسلوب الداخلية فى التعامل فى المواقف المشابهة
وما تقولش ان الهدف هوا حماية المتظاهرين او موضوع حظر التجول لان فيه ناس كتير ردوا على الكلام ده وانا مقتنع تماما بالرد
فلو عشان حماية المتظاهرين طيب ليه يوم السبت انسحبوا تماما هوا مش ادعى انهم يفضلوا عشان يحموهم طالما مسكوا فعلا بلطجية زى ما بيقولوا
اما موضوع الحظر فلو كنا التزمنا بيه قبل كده كان زمان مبارك لسه بيحكم دلوقتى
نقطة اخرى فى غاية الاهمية وهى ان الظباط الصغار بيتعمل لهم محاضرات يوميا من اجل غسل دماغهم والكلام اللى كان بيتقال لهم ايام الثورة قبل التنحى كلام يخض ومن نفس نوعية الكلام اللى كان الاعلام المصرى الرسمى والخاص بيشوهوا بيه الثورة وناسها واكتر شوية
وانا سايب لك التأكد من هذا الكلام بنفسك
طيب ما انت ممكن تسأل نفسك سؤال
وايه اللى يضمن لى ان الكلام اللى مكتوب فوق ده مش من الثورة المضادة ؟
مفيش ضامن لاى شئ الا الله
اعرض الموضوع على قلبك وعقلك واتعب نفسك فى انك تعرف ايه اللى بيحصل فى البلد من مصادر مختلفة ومتعددة وحرر نفسك من الآراء المسبقة اللى بتلاقيها مترسخة جواك من غير ما تعرف انت واخدها من المسلمات ليه
وان شاء الله ربنا يوفقك ويوفقنى ويوفق الجميع للخير
نقطة تانية فى غاية الاهمية عن كلام اصبح يتردد بين البعض على الفيس بوك ان الناس اللى معتصمين فى التحرير دلوقت بيقولوا لازم ظباط الجيش من عميد وانت نازل يثوروا وينقلبوا على القادة ويعزلوهم عشان الثورة ما يتمش الالتفاف عليها
الكلام ده لو مؤكد -يعنى شفته وسمعته بنفسك - يبقى اكبر غلط من بعض الناس الموجودة فى التحرير - وانا باقول بعض لانى واثق ان ده مش رأى كل الناس اللى هناك ولا حتى اغلبهم -
لان ببساطة هوا ده المخطط اللى الناس اللى عايزين يحجموا ويسيطروا على الثورة عايزين يدفعونا ليه ويا سلام بقى لو وسائل الاعلام تركز على وجهة النظر دى يبقى كده موضوع التحرير ده انضرب فى مقتل وهما سايبين ايديهم
ولو ما شفتش الكلام ده بنفسك وقريته من وسائل اعلام او من حد ناقله عن حد فده نفس المخطط ولنفس الهدف
ده مش معناه ان قلة ضئيلة جدا من الناس الرأى ده مش عندها والا ابقى كداب لكن ده عمره ما هيبقى رأى الاغلبية لأن النتيجة فى كل الاحوال هتكون مفزعة وكارثية
العيب كله فى التركيز على الرأى ده واظهاره على انه رأى الناس اللى فى التحرير
نقطة اخيرة قلتها قبل كده وباكررها المجلس العسكرى شئ والجيش شئ آخر
ولولا ان بوادر الانقسام ورفض الكثيرين من الوطنيين الصادقين والشرفاء فى الجيش ضرب الثوار بداية من يوم 28 يناير
بل وامكانية عزل الجيش لهؤلاء القادة كان اغلب القادة دول أيدوا حسنى مبارك صراحة
قد يقول البعض ان نسيبهم يعملوا اللى هما عايزينه وفى النهاية صناديق الانتخابات هيا الفيصل
بالنسبة لموضوع الصناديق وانها هيا الفيصل فانا مع هذا الرأى بكل اقتناع ولكن فقط فى مناخ حر مفتوح للجميع مش فى مناخ تحت السيطرة زى ما هما عاملين دلوقت
لان اى انتخابات فى الوقت الحالى مش هتصب غير فى الاتجاه اللى هما عايزينه فى ظل السيطرة الكاملة على الاعلام المصرى الرسمى والخاص
اللى محسسه الواحد اننا لسه ما قمناش بثورة ولا حاجة واننا كنا عايشين حلم جميل لازم نفوق منه
كل المطلوب من المجلس ان كان يريد خيرا ان ينفذ فورا اهداف الثورة التى لا تحتاج الى وقت لتنفيذها و ان يعلن صراحة عن جدول زمنى يلتزم به من اجل تنفيذ اهداف الثورة كاملة وبدون فصال أو تلكؤ يفقد الكثيرين الثقة به تدريجيا
وان يبتعد عن العاب فرق تسد التى يمارسها من البداية معنا
وليكن واضحا له ان هذه الثورة ثورة شعب ليس عنده استعداد للمماطلة او التفاوض على حياته ومستقبله

[b]للامانة منقول من مدونة احد اصدقائى فى المعتقل
الدكتور احمد شاهين[/b]

» موضوع للنقاش
» موضوع للنقاش
» موضوع للنقاش)؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
» موضوع للنقاش بكل صراااحه
» التكافؤ موضوع للنقاش