مرايه معانداني

موضوع: مرايه معانداني الخميس مايو 26, 2011 9:45 am

في ليل صمتي
بلاقي العتمه واخداني
اخاف واتداري من روحي
واتلفلف علي جروحي
واشوف صورتي
في مرايا معنداني
وجايباني
عجوز داس الزمان عمري
رسم باديه تجاعيدي
بصوره مشوفتهاش عمري
ارمي مرايتي من ايدي
وارجع اخدها من تاني

وانا بدعي ا كون واهم
لاني حقيقي مش فاهم
ده مين يبقي وابقي انا مين؟
ومن امتي وشاب شعري
وضاعت فين بقيت عمري
في لحظه ازاي تمر سنين
ارمي مرايتي من ايدي
وارجع اخدها من تاني

وايدي بترتعش م الخوف
اقربها عيوني تشوف
شبابي رجعلي من تاني

اشوف نفسي وانا صغير
براءة طفل متحير
وحلمي برسمه الوان
فراشة في الغيطان سارحه
اغمض عيني من الفرحه
واعيش لحظة بلا احزان
انا ومرايتي حاضناني

وتاني شكلي يتغير واتاخد
ملامحي تشيب
ويبقي حلمي لون واحد
بياضه كئيب

واقول دي مرايه ملعونه
يا اما عيوني مسكونه
وانا استسلمت
واتاري القصه ومافيها
لا عيب فيا ولا فيها
ولا اتجننت
مرايتي لما ابصلها
تشوف قلبي مابتشوفنيش
ولما شعري شاب فيها
ماغشتنيش

دي بتوريني لون جرحي
وترسم شكله ف ملامحي
مرايتي طلّـّه علي قلبي
وشايفه طفولته وشبابي
وتجاعيده اللي عايشاني

الله عليك يا شاعرنا

كلمات راوعة والله

تقبل تحياتي

ربنا يسعدك يارب
ويكتبلك الخير
وتبقى ديما بخير وكويس

.........................................
سأكتفى بالتعليق الاشهر لليوتيوب

لا يوجد وصف مناسب

.......................................