الرئيس يخاطب شعبه

الرئيس يخاطب شعبه الحبيب

يا شعبي حبيبي يا روحي يا بيبي * * يا حاطك في جيبي يا إبن الحلال
ياشعبي يا شاطر يا جابر خواطر * * يا ساكن مقابر وصابر وعال
يا واكل سمومك يا بايع هدومك * * يا حامل همومك وشايل جبال
يا شعبي اللي نايم وسارح وهايم * * وفي الفقر عايم وحاله دا حال
أحبك محشش مفرفش مطنش * * ودايخ مدروخ وآخر انسطال
أحبـك مكبـر دماغـك مخـدر * * ممشـّي أمورك كـده باتكال
واحب اللي ينصب واحب اللي يكدب * * واحب اللي ينهب ويسرق تلال
واحب اللي شايف وعارف وخايف * * وبــالع لســانه وكاتم ماقال
احب اللي قافل عيونه المغفل ** واحب البهايم واحب البغال
واحب اللي راضي واحب اللي فاضي ** واحب اللي عايز يربي العيال
واحب اللي يائس واحب اللي بائس ** واحب اللي مُحبط وشايف محال
واحبك تســـافر وتبعد تهاجــر ** وتبعت فلوسك دولار أو ريال
واحبك تطبـّل تهـلل تهبـّـل ** عشان ماتش كورة وفيلم ومقال
واحبـك تأيــّد تعضّـد تمجّــ ** د توافق تنافق وتلحس نعال
تحضّر نشـادر تجـمّع كوادر ** تلمـّع تقمـّع تظبـّط مجـال
لكن لـو تفكـّر تخـطط تقـرر ** تشغللـّي مخك وتفتح جدال
وتبدأ تشاكل وتعمل مشاكل * * وتنكش مسائل وتسأل سؤال
وعايز تنور وعايز تطور ** وتعمللي روحك مفرد رجال
ساعتها هاجيبك .. لايمكن أسيبك ** وراح تبقى عبرة وتصبح مثال
هابهدل جنابك واذل اللي جابك ** وهيكون عذابك دا فوق الاحتمال
امرمط سعادتك واهزأ سيادتك ** واخللي كرامتك في حالة هزال
وتلبس قضية وتصبح رزية ** وباقي حياتك تعيش في انعزال
هتقبل هاحبك .. هترفض هلبـّك ** هتطلع هتنزل هاجيبلك جمااااال

لا اله الا الله محمد رسول الله

حبيبى يا ديمو يا واد يا شاعر........بحبك لآنك بتسعدنى دايما....بشعر او مقال.............ديموووووووو

بحد الله يفتح عليك . . . رصيف نمرة خمسة والشارع زحام كل اللي اقدر اقولة انك جامد يامان

برافو عليك يا بيمو بجد كلامك جرىء جداااااااااا ربنا يوفقك

ههههههههههههه جميل جدا بس انت اللى كاتبه فعلا كلام فظيع بجد ربنا يكرمك ويسترها معاك انت كنت بتقول رايح فين انا كده فهمت هما هايعتقلوك؟ :shock:

المشكله ان الكلام حلو فعلا دى مشكله واكيد عارف هى ليه مشكله

تسلم ايدك يا بيمو