تبقى قاعد في امان الله مع مراتك وقاعدين تهرجوا تقولها بحبك يا توته وتقولك وانا
..... وفجأه يدق الباب .......
هو : خير الله اما يجعله خير من اللي جاي لنا الساعه ديه
هي: مش عارفه قوم افتح يا حبيبي
هو : ربنا يستر
ويروح يفتح الباب وللاسف ربنا ما استجبش لدعوته يلاقي في وشه حماته
هو: ( في سره اعوذ بالله من الشيطان الرجيم ) حماتي
حماته : ايوه امال عفريتها جاي اطل عليك ايه كل ده علشان تفتحوا الباب انت وقعت على ودنك ولا ايه
هو: في سرك ( يا رب الناس كبيره وصغيره بتموت وحماتي اللي خلاص العنكبوت عشش في مناخيرها لسه عايشه افتكرها يا كريم )
حماته : سرحان في ايه بقى
يا راجل يا ناقص اكلمك في التليفون وافولك تعالى بتخانق مع المعلم عكوة الجزار تقوم متجييش
هو : طب ما انا افتكرت ان ولادك اكيد هناك يا حماتي
حماته : ليه هو انا مستغنيه عنهم
هو : يعنى ايه مستغنيه عنى انا وبعدين ده راجل مفترى اخر مرة كان اتخانق مع جاركو اسماعيل الله يرحمه وفضل معلقه في المحل تلات ايام
حماته: بنتي حبيبتي معلش نسيت اسلم عليكي اما لاقيت الموكوس في وشي
هي : نورتي يا ماما يا حبيبتي عامله ايه
حماته : كويسه بس الراجل اللي اتعميتي واتجوزتيه رفعلي الضغط
هو : معلش يا حماتي معلش
حماته : عرفت ان بنتي حامل قلت اجي اقعد معاها لغاية ماربنا ينتعها بالسلامه
هي : بجد يا ماما
حماته : اه يا حبيبة ماما هاقعد معاكي وهانام انا وانتي في اوضه واحده فاهمه
هو : يا نهار اسود ديه لسه في الشهر الاول يا حماتي
حماته : وكمان بتسود النهار انا قلتها كلمه ربنا يسامحه ابوها اقوله نناسب ده يرد عليا ويقولي معلش ماهي خلقه ربنا
حماته : وبعدين في موضوع مهم عايزه اكلمك فيه
هو : خير
حماته : انت عارف طبعا انها حامل
هو : ايوه
حماته : وطبعا ابنك او بنتك هتحبهم
هو: طبعا
حماته:وعارف انها اكيد هتتوحم يبقى لغاية ما الوحم يخلص ماشوفك قدامي
هو: ليه يعني
حماته : حرام عليك الواد ولا البنت يطلعوا شبهك ده لو حصل افطسهم ارحملهم
هو: حرام عليكي امال اروح فين
حماته : انت طالما هتقعد معانا يبقى تتلثم تخبي وشك العكر
هو: اتلثم يا شيخه حرام عليكي
حماته : وانتي يا بنتي ولا تكلميه ولا تردي عليه زيه زي اي كرسي في الشقه فاهمة
هي: بس يا ماما
حماته : مفيش بس
هو : في سره كده يا حماتي طب اصبري عليا هاخليكي تموتي موته محدش ماتها قبل
كده اخليكي تموتي بفضيحه ان ما كهربتلك قاعدة الحمام يا انثى العنكبوت
(وفى النهايه عاوز اقولكم ان مش كل الحموات كده وربنا يخليلى حماتى
لانى بعتبرها زى والدتى بالظبط)
موضوع: حوار ساخر بين رجل وحماته 
الخميس نوفمبر 15, 2007 1:35 pm
