وعجبي

لقيت طيرة بتتألم ونار حامية بتكويها
على عود الحطب واقفة وشوك الدنيا حواليها
وصياد القدر واقف وبرصاصه هيرميها
سألت عليها عاوزأعرف
لمين هي ومين ليها
قالولي الأم سيباها وأبوها كمان ناسيها
يا عيني ضحية في الدنيا,
ياخوفي الوحده تضنيها
ده لو هب الهوا ليلة,
مسير العود يميل بيها
وقولت يا رب ساعدني.
علشان اقدر انجيها
شاورت بإيدي أناديلها,
وجاتلي وخدت بإديها
بنيت العش في العالي ,
وكان قصدي أعليها
ولما عششت جنبي,
وشوفت الفرح في عنيها
فتحت لحبها قلبي,
وقلت يا رب هنيها
وخدت من الشجر ورقه ,
عجنته الحنة أحنيها
وخدت من العسل شهده ,
عشان تاكل وأغذيها
وخدت من الهوا غنوة
بصوت الناي أغنيه
وجبت الورد من البلدي ,
عملته تاج يحليها0
وليلة في العشا جالها
واحد تاني يناديها
سابتني للي كان وحدي
ونزلتله برجليها