المفروض نعمل ايه يوم 6ابريل...نداء اللي ضمير كل مصري

انا الموضوع ده عجبني جدا لان هيكون تعبير عن راينا ولازم كلنا يكون لنا وقفه عشان نتغير

فهل ستكون صاحب موقف في هذه القضيه التاليه ؟

اكم ايجابيا ولو مره واحده

واتمني ان كل المشاركين علي اصدقاء لابد يكون معايا في اليوم ده ويكون ليهم وقفه لاني بحب ليهم الخير

إتفقت كافه القوي الوطنية في مصر علي
أن يكون
يوم 6 إبريل
يوم إضراب عام في مصر
يوم 6 إبريل
خليك قاعد في البيت أو شاركنا فى الميادين العامة
أوعي تنـــــــــزل لكن شاركنا
ماتروحشي الشغل
ماتروحشي الجامعه
ماتروحشي المدرسة
ماتفتحشي المحل
ماتفتحشي الصيدليه
ماتروحشي القسم
ماتروحشي المعسكر
عايزين مرتبات تعيشنا
عايزين نشتغل
عايزين تعليم لأولدنا
عايزين مواصلات أدمية
عايزين مستشفيات تعالجنا
عايزين دواء لأطفالنا
عايزين قضاء منصف
عايزين أمن وأمان
عايزين حرية وكرامه
عايزين شقق للعرسان
مش عايزين رفع أسعار
مش عايزين محسوبيه
مش عايزين ظباط بلطجية
مش عايزين تعذيب في الإقسام
مش عايزين أتاوات
مش عايزين فساد
مش عايزين رشاوي
مش عايزين إعتقالات
مش عايزين تلفيق قضايا
قول لأصاحبك مايروحوش الشغل همه كمان وخليهم يدخلوا الإضراب
) حزب العمل المصري- حركة كفاية - الإخوان المسلمين - حزب الكرامه - حزب الوسط - حركة موظفي الضرائب العقاريه - عمال غزل المحلة - حركة إداريي وعمال القطاع التعليمي - نقابة المحامين - حركة أستاذه الجامعات(
6أبريـــــــــــــــــل
أضراب عام في مصر سلمي
أبعت رسايل لخمسة من أصحابك
ولو كل واحد بعت لخمسة
في ظرف يومين البلد كلها حتعرف
بالموبايل
بالأرضي
بالأيميلات
أو حتي رسايل عالشات في قنوات التليفزيون
أنسخوا رسالتنا وأبعتوها تعليق على كل المقالات ألي بتقروها
بيكوا وبينا البلد دي حتتغير أنشاء الله
المسيحين مع المسلمين لصالح مصر

يالا يامحمد يالا يامينا مصر مش هتتغير إلا بإيــــدينـــــــا

بتقول ايه وعاوز ايه
دى مصر بلدهم يا سياده البيه
وانت ليك فيها ايه
بالكتير 300 جنيه
لو عاوز تعمل اضراب
هيقولوا حطوا راسكم فى التراب
لو هتقول مش موافقين
مش هتشوف تانى بنى ادمين
اقف مكانك ساكت
لا تعمل سامع ولا شايف
علشان تعرف تعيش يابيه
دى البلد بلادهم يا سياده البيه

كان نفسى بجد اقدر اكتب حاجه جامده
بس انا كاتبه منى للكمبيوتر على طول
تعبت من كتر مبقول هنعمل ومبنعملش
تعبت من كتر مبقول هنتغير ومبنتغيرش
تعبت من كتر مبنقول هنتحرك ومبنحركش
وفى الاخر زهقت وقالت ليك يوم يا ظالم
ماشى معاك فى كلامك مش هنروح الشغل ولا هننزل من البيت ولا ولا ولا ولا
وبعدين ايه النتجيه لو كان فى نتيجه كونت هقول يلا كلنا نقول لا
نقولها بصوت عالى نقول لا للظلم نقول لاللغله نقول لا لكل حاجه
مش راضين عنها بس اللى قالوا لا فين ههه محدش يعرف ليهم مكان
يا فسجن با مرستان البلد دى بلادهم اللى عاوزينه هيعملوه واى خطوه لينا
مش هتقصر عليهم مبقتش اقول ده ظلم بقيت اقول يارب اللى جاى يكون احسن
معلش طولت عليك المفروض نعمل ايه يوم 6ابريل...نداء اللي ضمير كل مصري 49536

المفروض نعمل ايه يوم 6ابريل...نداء اللي ضمير كل مصري 49536

لا تعليق

انا مع ساندي في رأيها
موقفنا مش هيعمل حاجه هما قرروا واحتا مش هنغير اللي هما قرروه
هو احنا ممكن نجرب نعمل كده بس بصراحه مش عارفه هيكون فيه نتيجه ولا لأ

أتمنى ان حاجة ممكن تتغير
بس صدقونى احنا اضعف من كدة
البلد دى قوية قوى عليا وقاسية قوى
وقلبها جاحد ومبتفكرش غير فى نفسها

فيه خطه خمسينيه فى مصر

يعنى معروف ايه اللى هيتعمل فى مصر بعد خمسين سنه

سواء كنا موجودين او غير موجودين

سواء وافقنا او رفضنا

وارجع واقول كل حاجه ممكن مافيش حاجه مستحيل

بسم الله الرحمن الرحيم
حابب أعلق على موضوعك
انا هلفت نظرك لحاجه بسيطه خالص ..
عارف معنى كلامك أيه ومعنى إن يكون فيه إضراب يعنى أيه ؟؟
معناه إن كل حاجه موجوده مش قادره تغير حاجه
معناه إن عندك أكتر من 50 قناه فضائيه يعنى تعبير حر وحريه رأى ونقد فى الحكومه وقول كل اللى نفسك فيه
دول كلهم ملهومش لزمه ولا ليهم صوت مسموع عند الحكومه
معنى كلامك إننا عندنا ألف جريده ومجله ومنهم كتير اوى معارضه وده كله ولا عرف يغير حاجه من اللى موجود
معناه برضو إننا ولا مره فى حياتنا عملنا إضراب ولو على مستوى المدرسه الثانوى لما كانوا بيخلونا مننزلش ألعاب
تيبجى دلوقت تقولى نعمل إضراب عاااااااام وشامل
ده احنا ولا قدمنا 100 سنه على ما نعرف معنى كلمة إضراب أساسا

وعايز بس أترحم ع الفضائيات والجرايد والمجلات والسياسين والمعارضين وكل واحد قال لأ فى البلد دى
للدرجه دى مفيش أى حاجه جايبه نتيجه وعايزين نعمل إضراب شامل
طب سؤالى بقا ... بعد كل ده معقول إضرابنا هيعمل نتيجه طيب؟؟
مش هجاوب

كلامك مظبوط يا اوز وكلام سليم
احنا علشان حال البلد دى يتغير لازم نغير من انفسنا الاول
ان الله لا يغير ما بقوم حتى يغيروا ما بانفسهم
اتمنى تكون فهمت قصدى

عجبنى كلامك اوى يااوزو
بس قد معجبنى قد مخنقنى
لانه بيوصلنا للحقيفه
الا بنحاول نعيش ونعمل مش شيفنها
ممممممممممم
ربنا يستر من اللى جاى

كل دى عاوزين عاوزين

الحكومة مش هتعمل كل حاجة . انت فين من ده كله . اقولك انا انت فين انت فى اعتصام ملوش لازمة قاعد محلك سر مستنى الحكومة تظبطك وتجيبلك واوعى تنسى ان احنا السبب الاول والتانى والتالت فى المشاكل دى كلها بتخلفنا وكثرة الانجاب لما البلد هتنفجر ومش لاقية حل وباننا مربعين ايدينا مستنين الفرج من عند ربنا لكن نعمل حاجة لا

انت بتقول عاوزين شغل وبيت للعرسان ومرتبات واكل ووووووو. طب تعالى هنا قلى انت عملت ايه لده كله اتعلمت طب وبعدين هو ده كله اللى عليك طب دورت على شغل خدت كورسات كمبيوتر ولغات ولا مستنى الوسطة هى اللى تجيبلك الشغل سعيت

ده ربنا بيقول اسعى يا عبد وانا اسعى معاك

احنا كدة عاوزين ابسط الحلول " الاعتصام " طب انا اهه وانت اهه لو البلد كلها عملت اعتصام ولا مشكلة هتتحل وابقى قابلنى

انا مش عاوزة اطول اكتر من كدة ومش عاوزاك تزعل منى بس انا اتحطيت فى الموقف ده لما اتخرجت واستنيت ان الدنيا تضحكلى لوحدها ملقتش اللى يفهمنى انى لازم اسعى

وفى الاخر بجد مش عاوزاك تزعل من ردى

انا معجبه بالتفكير ده جدا

واى تصرف ايجابى احسن بكتير من السلبيه اللى احنا عايشين فيها

فى اى بلد محترم تانى الدوله بتقدس رغبات الشعب

وحقهم فى حياه كريمه

ياريت نلمس لمحه تغير

وده مش هييجى غير لما نتغير احنا نفسنا ونبطل سلبيه

نعمل اى شىء ولو بسيط

وان شاء الله هيجيب نتيجه

الظالم جبان

وبيتاثر بسرعه

بشكرك

اختك

فجر

نقاش من اروع ما يكون

ومع اني ملئ باليأس

بس بردك عندي أمل

افهموها انتم بقة

وبعد ما تخلصوا ابقوا فهموهالي

والنبى ما انت فاهم حاجة خالص

انت يا بيمو اكبر عقلية مهيسة شفتها فى المنتدى

وعجبى

وجهه نظرى اعتقد ان محاوله الاضراب الشعبى فى 6 ابريل هتكون غير ناجحه بلاش فاشله مثلها كمثل المحاولات السابقه
للاسف هى دى الحقيقه لان الاضراب الى بينجح فى البلد دى يكون اضراب فئوى تماما مثل اضرابات عمال شركه غزل المحله او اضرابات موظفى الضرائب العقاريه اما ان يكون الاضراب عام لكل فئات الشعب يؤسفنى انى اقول ان المصريين لم يصلوا بعد لثقافه المصلحه العامه دى
المهم انا معاك يوم الاضراب هضرب عن كل حاجه يوم 6 ابريل
ربنا يوفئنا نحن الجيل الى هيخرب البلد لالا قصدى الى هيصلح وينمى البلد
عمار يا مصر بقوادك الى هيموتوا الشعب من الجوع
تقبل مرورى
اختك دندونه المفروض نعمل ايه يوم 6ابريل...نداء اللي ضمير كل مصري 49536

اولا شكر علي ردودكم

ثانيا انا كان نفسي اعرف ايه موقفنا وكل واحد عبر عن رايه بحريه وقال اللي جواه وهو دي اللي كنت عايزه

» اتعلمو بقا من اليابانيين .. ضمير ضمير يعنى مش هزار
» هو من المفروض ان البنت تكلم ولد؟!!!
» المفروض بمناسبة رمضان
» نداء الروح
» ** نداء الى كل الأعضاء.........**