اول موقف
نزلت في المطار هتجنن واشرب شاي .. اصل ده البنزين بتاعي ومن غير تلاقيني بكركر واشحر واحول وافصل شحن واهنج
عشان كده اول حاجه عملتها سيبت الشنط وروحت ادور علي حته اشرب فيها شاي شوفت زي بوفيه صغير كده واقف فيه واحد شكله مش عربي اكتشفت في الاخر انه هندي وطبعا انا اخر معلوماتي عن الهنود كانت اميتاب بيتشان والمزز الحلوه اللي بتطلع معاه وللعلم المزز دي شكلها مش هنود مستوردينها او تهجين لان الهنود اللي شوفتها هنا كلها شكل فلافيو بتاع الاهلي
المهم قولتله تي بليز فهز راسه زي مابنهز راسنا لما نقول لأ وبرطم بكلمتين وبدا يكلم الراجل اللي واقف جمبي
استغربت جدا هو فيه ايه بس قولت يمكن مايعرفش انجليزي فقولتله شاي لو سمحت عمل نفس الحركه وبرطم بكلمتين اعتقد ان هم هم الكلمتين اللي قبل كده وطبعا انا كنت كده كده مش طايق روحي واول مره اسافر والحياه فله بدات اعصابي تفلت وحسيت اني في كوكب تاني مش في السعوديه وبدأت ابرطم انا كمان
وصوتي يعلي والواد لاقيته مستغرب قوي من رد فعلي وبيهز راسه يمين وشمال زياده
حسيت انه بيغيظني بس لفت نظري الراجل اللي كان بيكلمه وهو ميت من الضحك حسيت انه مصري قولتله انت بتضحك علي ايه ياعم انت كمان مش كفايه المصيبه ده في الوقت ده كان الهندي عمل الشاي وبيدهولي 4ولت هو هنا كمان مابتجوش غير لما ازعق امال بتقول لا من الصبح ليه رد المصري وقاللي ياعم هو بيهزلك راسه شمال ويمين يعني حاضر............
نعم ؟؟؟؟؟؟؟؟ هو كده يعني حاضر امال لو هيقولي لأ هيعمل ايه هيتف في وشي ؟وروحت هازز للهندي راسي زي ماكان بيعملي واتلفت للمصري هزيتله راسي برده وسيبتهم ومشيت
وده كان اول موقف مع الهنود
موضوع: حكايات عمو جو في الغربه 
الخميس سبتمبر 30, 2010 10:44 am
