كرسي الاعتراف ..فجر

اخـر كرسى اعتراف كان لاوزو







نختار كلنا عضو علشان يقعد على كرسى الاعتراف








ياترى مين اللى هيقعد على الكرسى؟؟




v

ههههههههههههههه

انا اختار  قوجى

وانا معاكى يا مايا هختار فوجى

وانا كمان اختارك يلا اعدى على الكرسي

يلا يا فوجى جوبى ع الاسئله الضغننه دى

أيه أكتر حاجه بتحبهيا فى شخصيتك وأكتر حاجه بتكرههيا ؟؟؟
_ مين الشخص اللى بتحتاجى تتكلمى معاه ولما بتكونى مخنوقه مش بتدور على حد غيره؟
_امتى عملت حاجه وندمت عليها ؟
_ايه الموقف اللى حصلك وحسيت بالخجل فيه؟
انتى راضيه عن نفسك وحياتك ولا ........؟؟
امتى تنزل دموع فجربغزارة ؟؟
ايه الامنيه اللى نفسك تتحقق ؟
مين اكتر حد قريب منك فى الواقع وفى المنتدى ؟
_ايه السبب فى غموض فجر وهو غامض فعلا ولا لا ؟؟؟؟؟؟؟؟؟
اجمل يوم في حياتك كان امتى؟؟
ايه اكتر شئ ممكن يضايقك ومستحيل تسامحه ابدا ؟
ايه الموقف اللى حصلك وعمره ما كان فى حسابك يحصلك ابدا ولا متوقع يحصل؟
أية أكتر حاجة بتخافى منها..؟؟؟؟؟؟؟؟؟؟؟؟
أيه أكتر خبر زعلك وأكتر خبر فرحك فى عمرك كله ؟؟؟
كرهتى حد قبل كدا وليه كرهته
تفتكرى الصداقه والحب مين اقوى فيهم ومين الافضل عندك ؟
_بكيتى قبل كده على فراق حد ؟

لما بتكونى مخنوقه بتعمل ايه بتتتكلم ولا تعدى لوحدك ولا ايه؟

1- انتى شايفه إن شخصيتك كويسه ولا لأ ؟؟يعنى حابه تغيرى من نفسك ولا انتى كده تمام ؟؟
2-أيه اكتر شىء حلو فى حياتك ؟؟
3-أيه هى طموحاتك ؟؟؟

يلا جوبى بقى

يا خبر يا مايا كل دى اسئله حرام عليكى والله كنت هسالها بس صعبت عليا كفايه عليها الاسئله دى

يا حلاوتكم يا جمالكم

مش عايزين اسئله صعبه

ربنا يستر اللى كنت بعكمله فى الناس ميطلعش فيا

اسئلوا بالراحه بالراحه

وانا معاكوا بمنتهى الصراحه

ايه ده شاعره يا اخواتى ههههههههههههه

المهم انا مستعديه للاسئله يالا اسئلوا

اختكم

فجر

يا بنت الايه يا مايا انا عملتك ايه هههههههههههه دى كلها اسئله بس اسئله حلوه اوى

اوكى 1 اكتر حاجه بحبها مش غرور ولا حاجه بس لاحظتها فى نفسى من خلال معاملاتى مع الناس يعنى ومن خلالهم هم اكتر حاجه بحبها الطيبه والاخلاص اكتر حاجه بكرهها العصبيه

2 اان بعمل حاجت كتير وبندم عليها للاسف لانى احيانا بكون متسرعه بس يمكن اكتر حاجه فى حياتى انى اديت ثقه لواحد ميستهلهاش ابدا

3 بس السؤال التالت مش واضح حسيت بالخجل من نفسى يعنى ولا اتكسفت م الموقف نفسه ؟؟؟؟؟؟؟؟؟؟؟ لو كده موقف بشع كنا فى الدرس وكاتن فى ولد مبحبوش ابدا فاكر نفسه بتاع بنات والنظام ده اتكعبلت ومسكت فى بنطلونه الحمد لله هههههههه كنت خلاص فى تلات اربع هدومى مكنتش عارفه اروح م الاحراج لو اتكسفت من نفسى عامه لما بظن بحد حاجه معينه ويطلع برىء بتكسف من نفسى اوى اوى يمكن بخاصم نفسى كمان هههههههههه بجد

4 راضيه الى حد ما بس مش فى كل الحالات يعنى ساعات كنت بتمنى اكون فى ظروف تانيه مش من الناحيه الماديه لا من الناحيه الاجتماعيه يعنى اوصل لدرجه حب وارتباط اكتر مع اهلى والله ساعات احسهم صحابى جدا وساعات احس شويه انهم مش فاهمنى بس الى حد كبير الحمد لله راضيه وحاسه انى الحمد لله عندى حاجت كتير ناس تانيه تفتقدها فلازم اشكر ربنا وارضى بحكمه

5 لا فى الموضوع ده انا نيله خااااااااالص لانى دمعتى قريبه اوى تنزلا بغزاره لما حد عزيز على افقده او ممكن وانا بشوف فيلم بجد بعيط بهبل وكمان لما اقرا موقف مؤثر وبالزات لو دينى ببكى اوى لما احس انى بعيده عن ربنا او احس انه مش راضى عنى بس ببككى كتير ممكن ابكى لما احس بالظلم لا ببكى كتير بس يمكن الموت ببكى بكاء شديد اوى اوى

6 انا عندى امنيات كتيره تفسى احققها منها انى احضر فرح انتيمتى بجد نفسى اشوفها وهى عروسه انتيمتى هوبه من الحضانه معايا بحبها موووت عارفه احساس الام بحسه ناحيتها ونفسى اشوفها بالفستان الابيض وامنيتى الشخصيه انى اكون ناجحه فى حياتى بشكل عام اكون ام ناجحه فى بيتى وفى شغلى وانى الاقى تعاملاتى مع الناس اساسها الحب مش اى حاجه تانيه

7 بصراحه فى ناس كتير اوى قريبين منى مقدرش اقول شخص معين بس انتيمتينى هوبه واوشه واسماء وايمان قريبتى بحبها اوى اوى فى المنتدى بمووت فيهم كلهم بس يمكن اقرب حد نانسى وساندى ونهال وبيموواحمد ومش عايزه اى حد يزعل لانى بحبكم كلكم ربنا يعلم ازاى بس الظروف جمعتنى بالناس اكتر من التانيه

8 بصى حكايه الغموض دى معرفش مبحسش انى غامضه بس يمكن بحس انى شخصيه غربيه يعنى ممكن تلاقى فيا متناقضات معرفش بس يمكن السبب انى نفسى اوصل لحاجات كتير اوى مع بعض نفسى اكون حاجت كتير فبيعمل عندى تناقض يمكن معرفش بس انا بحس انى شخصيه غريبه فيا حاجت كتير صعب تكون فى انسان واحد

9 من اجمل ايام عمرى لما اتقابلنا اول مره انا وساندى وجو ونهال وبونى واحمد سبايكى كان يوم عمرى ما هنساه

10 لللاسف الشديد مبعرفش مسامحش للاسف بسامح على طول الخط بس يمكن عدم الاحترام المتعمد بيبقى عندى خط فاصل خلاص انتهى مبسامحش عليه

11 مممممممممم مش عارفه بس يمكن اسماء صحبتى كنت عمرى ما اتخيل ابدت اننا ممكن نكون صحاب بالشكل ده كنت بحس انها غير ما هى دلوقتى مكنتش اتخيل ابدا ان احنا ممكن نقرب من بعض كده

12 من ضمن التناقضات احيانا احس انى شجاعه جدا واحسانا اخرى احس انى جبانه بس يمكن اكتر حاجه بخاف منها بعد ربنا الفشل بخاف منه اوى وكمان سوء الظن بخاف اوى ان حد يفهمنى غلط وبخاف جدا م الكلاب ههههههههه بمشى فى شارع تانى لما اشوفهم

13 اكتر خبر زعلنى موت صحبتى حنان وكمان خبر سىء لصحبت اوشه بس مش هينفع اقوله لانه يخصها هى اكتر خبر فرحنى لما عرفت انى داخله تربيه ولما ساندى قالتلى انها جايا وكمان لما لقيت نفسى مشرفه هههههههههه والله فرحت اوى

14 للاسف كنت فاكره نفسى بعرف اكره لكن فى النقطه دى بكون ضعيفه اوى مبعرفش اكره حد والله بجد وجربتها جربت اكره معرفتش ممكن تلاقينى اقول انا بكره الشخص ده موووت لكن فى الحقيقه الاحساس ده غير صحيح انا ممكن محبش لكن مكرهش منهم شخص مش عايزه اشوفه فى حياتى تانى ابدا

15 الاتنين احاسيس روعه لا غنى عنهم بس انا دايما بقول ان الحب بيحلى الحياه ويديها شكل مختلف تماما اما الصداقه فهى الحياه ومتنفعش من غيرها فالاتنين مهمين جدا بس انا ممكن اعيش من غير حب لكن مقدرش اعيش من غير صداقه

16 الفراق الابدى لصحبتى حمنان بكيت عليه كتير ولسه ببكى كل ما اطلع البلكونه واشوف بلكونتها قدامى فى وشى بفتكرها وادعيلها بالرحمه والمغفره

17 لما بكون مخنوقه محبش يبقى معايا حد خوفا عليهم هم لانى للاسف ببقى غبيه بفضل اكتب وبطلع حاجات حلوه اوى ههههههههه بس بحب اروح مثلا ع البحر بحب الاحساس ده اوى او اكتب كلمات حزينه تعبر ع اللى جوايا

18 لا طبعا مفيش انسان كامل وانا محتاجه كده اغير من نفسى عشان اكون احسن بس الحمد لله مش كارهه نفسى والحمد لله راضيه عنها الى حد ما بس محتاجه اجملها بتقربى من الله اكتر واكتر

19 اكتر شىء حلو فى حياتى صحابى فعلا صحابى من غيرهم معرفش اعيش وكمان نينتى ربنا يخليهلى يارب

20 طموحاتى كتييييييييييير اهمها المدرسه اللى كلكوا عارفنها وكمان الزواج عن حب بحلم بيه بس عارفه انه مش هيتحقق لانه صعب اوى


خلصوا اه خلوصا يااااااااااااااااااااااااه انا بجاوب بقالى كتير

هل من مزيد انا معاكوا اهوه

اختكم

فجر

حد جرحك قبل كده ولا لأ ؟؟؟وياترى لو حصل حالتك كانت إزاى وخرجتى من الموقف إزاى ؟؟
-أيه أكتر خبر زعلك وأكتر خبر فرحك فى عمرك كله ؟؟؟
رأيك فى الحب أيه ؟؟؟؟
هل جرحت حد قبل كده جرح كبير أوى ؟؟؟ولو حصل ندمت ولا عادى ؟؟؟

هو انا بس اللى بسال ولا ايه هههههه

الله الله ده انتقام بئى هههههههههههههههه

ايه يا اوزو ده احنا زمايل واخوات ليه كده بس انا مرتاحه والله مش عايزه اتعبك ههههههههه

ايه يا مايا حرام عليك بصى انا اتجرحت اه واللى جرحنى انى سامحت مره واتنين وتلاته وفى الاخر برده اتجرحت وكنت فى حاله وحشه جدا يمكن كرهت فيها الجنس الاخر تماما ومعدش عندى ثقه فيهم بس خرجت لما اتقربت من ربنا وشغلت نفسى بحياتى مع صحابى وشفت الدنيا من زاويه تانيه

الخبر الوحش والحلو انا قلته قبل كده اقريه بئى فوق ههههههههههههههههه

الحب طبعا اكسير الحياه هو اللى بيخليلها لون وشكل وكعم ومعنى ومش لازم الحب العاطفى اى نوع من انواع الحب وفوقهم حب الله سبحانه وتعالى يعنى بجد لو مفيش حب هتكون الحياه جامده جدا وانا عن نفسى مش هقدر اعيشها لان الحب هو احلى رباط ممكن يربط الناس وبينقى القلب

بيتهيالى مجرحتش حد جرح كبير قبل كده ممكن مثلا اتصرف تصرف غصب عندى فاضايق حد او كده بس جرح بيتهيالى صعب اوى عشان انا بخاف على مشاعر اللى قدامى جدا ولو على حساب نفسى لان لو حصل وجرحت حد هندم جدا وهانب نفسى ومش هسامحها وانا مش اد الموضوع ده خاااااالص

ماشى يا مايا اما اشوفك

اختك

فجر

رور حبى ايه البدايه دى بس

انتى عارفه لو قلتيلى اكتر حاجه بكرهها ايه اقولك الغرور وانا بجد الحمد لله ممكن يكون فيا كل حاجه وحشه فى الدنيا الا الغرور الحمد لله انا بعشق التواضع ومبحبش ابدا حد يتكبر على حد لان مفيش سبب يدعو لذلك لان كل شىء زائل والله العظيم دى الحقيقه انا فعلا معتقدش انى حسيت بالغرور ابدا ولو حسيت انى ممكن يحصل ولا حاجه بوبخ نفسى جامد وبعرف نفسى قيمه نفسى انى ولا حاجه عشان بس افكر انى اتغر بس الحمد لله محصلش ويارب ما يحصل


بالنسبه للحب معتقدش انى حبيت ممكن تعود تاقلم اشتياق اى حاجه الا الحب العاطفى يعنى و
دلوقتى مفيش حاجه خالص قلبى فاااضى هههههههههههههه عندك عريس هههههههه


احس انى محتاجه اتكلم مع حد لما اعمل تاتش معاهم فى البيت او احس بالظلم عامه او بالجرح ببقى محتاجه اتكلم مع حد اوى

اصعب موقف مش فاكره بس يمكن مكوت صحبتى اثر فيا اوى والى كان صعب انى كل ما اقف فى البلكونه افتكرها وكل ما اروح ازور مامتها افتكرها

موقف مضحك كنت مره فى الجامعه وكشكول وقع منى وكان قدامى شاب فنزلت اجيبه انا وهو فى نفس الوقت فخبطنا فى راس بعض ههههههههههههههههههههه اتكسفت اوى بس ضحكت مقدرتش وبرده كنا رايحين درس باليل وكانت الدنيا ممطكره وزحلقه خالص فبقول لهوبه حسبى تقعى لسه بقول كده قمت متزحلقه انا وشنطتى اتكسرت كنت بحبها اوى ههههههههههههههه

موقف ضايقنى كان من دكتور ربنا يبسامحه بئى كان مدينا واجب كتير جدا فى يوم واحد ففضلت طول الليا اعمله ومنمتش وصحابى نقلوا منى كمان جه الصبح قال انا مكنتش متخيل ان العدد ده كله هييجى نظام تعجييز وقال اللى عامل كذا كذا غلط يطلع بره وهباخد صفر عايز يقلل العدد باى شكمل كنت منهم اضايقت جدا وعيط لان ده ظلم بجد انا كنت عامله بالزياده تانى يوم يقول خلاص هديكوا فرصه تانيه عشان متعيطوليش مره تانيه وبصلى اضايقت منه اوى حسيت انه معندوش دم

انا قللت الاغانى جدا الحمد لله بس بحب تامر حسنى او كنت بحبه لانه بئى قليل الادب شويه بس كنت بحب احساساه وحنيته كده وكمان متواضع بحب نانسى اوى شقيه كده وعسل بحب كاظم وانغام وعبدالحليم وفيروز جدا فنانه محترمه بمعنى الكلمه

بحس احيانا بالوحده لما اكون فى اسماعيليه لانى بكون بعيده عن قرايبى وصحابى بحس انى فى منفى رغم ان ليا صحاب كتير هناك بس برده بحس احيانا بالوحده

يوم النتيجه لما اجيب تقدير اعلى م الى كنت متخيلاه فى ماده او عامه بفرح مووووووووت

عامه حب الحياه بس ساعات بتجيى على مواقف بضايق من حياتى بس برجع استغفر ربنا
طول منا قريبه م اللى بحبهم بحب الحياه جدا

اخترق قلبى ههههههه مش عارفه انتى قصدك ولد يعنى ولا ايه ههههههههههههههه بس اطمنى مفيش هو بس زمان بس كنت طفله يعنى قابلت شخص فى جنينه ولعبنا مع بعض وبتاع بس كنت حاسه انى اتعلقت بيه اوى بس كنت طفله والله لغايه دلوقتى كل ما اروح فى نفس المكان افتكره وافتكر براءه الطفوله كنا بنلعب لعبه كده نقف دايره ونمسك ايد بعهض ونفضل نلف مش فاكراها بس انا فاكره لما مسكنا ايد بعض بس هههههههههههههههههههههه كنت مكسوفه وفرحانه فى نفس الوقت ههههههههههههههههههههه طفله بئى

الحمد لله اشهد ان لا اله الا الله


تم بحمد الله اجابه اسئله الانسه رورو

اختك

فجر

ماشى يا سما ايه الحنيبه دى هو سؤال بس مش سهل يعنى

بسم الله الرحمن الرحيم

بصى يا سما بجد انا بحب الحب اوى وكان طول عمرى بحلم انى اقابل شاب احبه ويحبنى بجد ونعيش قصه حب جميله مفيش زييها بس لما كبرت شويه اكتشفت ان دى احلام ورديه صعب تحقيقها

هو مش مستحيل بس معايا انا صعب لانى معرفش بخاف من حاجت كتير ومحبش اغضب ربنا برده وفى نفس الوقت مش لاقيه الشخص المناسب ولو لقيته انا بقيت شكاكه جدا ف الموضوع ده وبسمع حاجات تخوف بجد

انا نفسى الاقى الحب بس عارفه انه صعب

كان قبل كده فيه حاجه كده بس خلاص


كانت احسن صفاته الحنيه والاحتواء احساس جميل اوى انك تحسى ان اللى قدامك فاهمك وعارفك اكنه انتى بيعرف ازاى يتعامل معاكى ويغير منك ومن مزاجك ويقلب كيانك كله بمجهود بسيط

اصعب حاجه كانت الكدب وهو ده كان السبب فى الفركشه

يا حنيتك يا انسه جوجو

شكرا على الحنيه ههههههههههههههههههه

اختك

فجر

سرقتلك شويه اسئله جاوبى عليها

-هل انتي مزاجية؟

2-هل انتي معقدة؟

3-هل تشعرين بالملل؟

4-هل انتي ذوق باختيار ملابسك؟

5-مالصفة التي تطلق عليك غالبا؟

6-هل انتي مغرورة وشايفة نفسك؟

7-هل انتي حنونه؟

8-هل كذبتي مرة كذبة قوية ودخلت على الكل؟

9-تحسين ان في شي ناقص في حياتك؟

10-هل تحسين انك مظلومة؟

11-هل ندمتي على قرار اخذتيه بحياتك؟

12-هل انتي غيورة؟

خلصو اخيراااااااا

بسم الله الرحمن الرحيم

دى شويه اساله كده على خفيف

1 _ انت شايفه المستقبل ازاى؟

2- انت بطبعك متفأله ولا متشائمه ؟

3- مين افظع شخص قابلتيه فى حياتك ويل ريت تحكيلنا عنه

4- هل احيانا بتحسى بلحظات ضعف ويأس؟

5-الفلوس بتمثلك ايه فى حياتك ؟

6- ايه دور الاصحاب فى حياتك؟

7-لو هتروحى مكان ومينفعش انك تخدى معاك غير 3 حاجات هتخدى ايه ؟

بس خلاص اتمنى انى مكنش تقلت عليكى

ايه ده انا عملتلكوا ايه فى حياتكوا

ايه طابور الاسئله ده

انتوا داخلين تحاربوا ولا ايه

كل دى اسئله يا نهار ازرق

اخواتى ولازم استحملهم اعمل ايه بس ههههههههههههههههههه

والله العظيم بحبكوا موووووووووت

يا هادى يارب