ذاكر تنجح غش تجيب تقدير!!!!!!!!!!

ذاكر تنجح غش تجيب تقدير "

---

يا ترى يا هل ترى لو أنت دخلت لجنتك في امتحان من الامتحانات بصيت لاقيت مادة تانية غير اللي أنت كنت مذاكرها هاتعمل إيه ؟؟؟

طيب...ولو قلنا إن المادة هيه هيه بس الامتحان مش عارف تحله إيه العمل ...؟

طيب آخر سؤال ...لو الامتحان جه سهل وأنت اللي مش مذاكر برده هاتعمل إيه....؟

كتييير كتيييير بيفكروا إنهم يغشوا في الامتحانات ...أنت إيه رأيك..؟؟!!

هاتغش ولا هاتغش........؟!

هل فعلاً الغش وسيلة سهلة للنجاح...؟

ولا الغش أصل من أصول من النجاح ....؟

وهل فعلاً صحيح لو ذاكرت هاتنجح ولو غشيت هاتجيب تقدير..؟

ولا إيه بالظبط.....؟

أنت مثلاً لو أتيحت لك فرصة للغش في سؤال وقف قصادك هتغش ولا لأ ؟!

وقعت قبل كده في موقف ظريف وأنت بتغش..؟

كل ده أسئلة حاولنا نوصل لإجابة عنها مع مجموعة متنوعة من شباب الجامعة من مختلف الكليات تعالوا نشوف رأيهم كان إيه...



بصراحة...أغش عشان أنجح



"
بصراحة...لو في فرصة إني أغش هاغش لأن ده الفرصة في النجاح وبعدين هما
اللي بيضطرونا لكده ، بيضغطوا علينا طول السنة وبعدين المواد نفسها صعبة
وممكن يقولوا حاجة وحاجة تانية تييجي في الامتحان وبعدين بغش أو من غير غش
هو نظام التعليم بتاعنا كده لان التعليم لا يعتمد على الفهم بل يعتمد على
الحفظ . فلازم نغش" ده كان رأي جريء جداً لمراد منصور كلية إعلام الفرقة الرابعة قسم ثقافة.

وأضاف أحمد حمدي احمد الفرقة الأولى دار علوم " هغش طبعاً ، أنا مقتنع إنه حرام بس هاغش لأني هانجح بس ده ما يمنعش إني أذاكر طول السنة لأني في كلية تدريس يعني اللي أنا هاخده هادرسه لناس بعد كده لما أنا مبقاش فاهم هادرس إيه بقى " ومن نفس الكلية يقول محمود حامد " بصراحة!!!هاغش عشان الواحد بيبقى عنده ظروف مثلاً فمبيلحقش يذاكر فعلشان
ينجح لازم يغش وطبعا الاعتماد على الغش غلط بس ساعات الواحد بيبقى محتاج
درجة ... " أما عن شباب كلية تجارة فكان رأيهم مشابه لزمايلهم حيث قال رامي من الفرقة الأولى " بأمانة آه هاغش طبعاً عشان أنجح لأنه أسهل وسيلة للنجاح " .

بيقولوا إن البنات هم أكثر من الشباب في المذاكرة بس لما سألنا شيماء محمد من كلية تجارة
عن موضوع الغش قالت : لو مش عارفه حاجة وفي فرصة هاغش بس لو مفيش فرصة مش
هحاول إني أغش وأنا الحمد لله ماغشتش قبل كده وعلى فكرة لو الواحد عرف إنه
ما فيش غش أكيد هايعتمد على نفسه ويذاكر "

وأضاف سامح نبيل من كلية تجارة : " الاعتماد على الغش حاجة المرضى إزاي هيموتهم..... ولا يدخل يعمل عملية لواحد إزاي يعني.."

ولما رحنا ناحية كلية اقتصاد وعلوم سياسية لقينا محمد دياب من الفرقة الرابعة
دخلنا عليه وسألناه نفس الأسئلة قال: "بصراحة لو مزنوق ومش عارف حاجة
وجاتلي الفرصة هاغش ما أنا في رابعة يعني .." وكان رأي غريب جداً لزيد إسماعيل اقتصاد وعلوم سياسية قال فيه : " آه طبعا الفرصة بتيجي مرة واحدة و لازم استغلها بأي طريقة وإن الله غفور رحيم "

ده
كانت مجموعة من آراء بعض الطلبة المؤيدة لموضوع الغش وإن كان لهم ضوابط
يعني الكل أجمع على أن الغش غلط وله آثاره السلبية فضلاً عن حرمانيته
الشرعية .

وعلى رأي واحد أعرفه كان بيقول دايماً اللي بيغشوا دول طلبة أونطه في أونطه

بيتعلموا تعليم أونطه في أونطه وكل واحد فيهم بيتخرج أونطجي كبيييييييييييييير.


من غشنا فليس منا



وأما آراء باقي الطلبة فيقول: علي حليم 2 طب أسنان " علشان ربنا بيراقبني يعني

لو المراقب مش شايفني فربنا شايفني وأنا أعرف واحد في سياسة و هيتخرج و كان في الملف بتاعه محضر غش فقضى على مستقبله."

أما أحمد حامد 3 تجارة
يقول: "لو في الثانوي آه لكن دلوقتي لأ كان زمان الواحد بيقول المنهج وحش
و الأساتذة أوحش فاحنا نغش لكن دلوقتي بعد ما كبرت عرفت إن ربنا مراقبني "
ويضيف محمود عبد المعبود 3 حقوق"لأ
..علشان في مواد غشيت فيها و مجبتش اللي أنا عايزه و في مواد مغشتش فيها و
برده مجبتش اللي أنا عايزه فأنا حاسس انه ربنا بيعاقبني "

أما أحمد نصر 3 تجارة رفض الغش لسببين :

" أولا: لأنه حرام ، ثانيا: لان كما تدين تدان ممكن ربنا ميوفقنيش في الدنيا يإما حد هيغشني في شغلي. ولي عقاب عند ربنا لأن من غشنا فليس منا "

وزميله عامر محمود كلية التجارة يقول "لأ طبعا و الواحد يستشعر الموضوع ده لما يبقى مذاكر و يجيب 18 و اللي جانبه مش مذاكر و يجيب 18 "

أسامة محمد السيد كلية علوم يقول " أنا لا أغش أغشش بس أما اللي بيغش هو بيضر نفسه فهو بيخلي نفسه في مستوى لا يستحقه و احنا دلوقتي بنعاني من انه ناس متخرجه من كليات عليا و ما بتعملش حاجه"



آثار سلبية ومواقف محرجة



طبعا
بلا شك إن الغش له آثار سلبية كتيرة ده طبعاً غير المواقف المحرجة اللي
ممكن تتعرض ليها وإنت بتغش وده كان كلام كتير من الشباب حيث قال ياسر رمضان طه دار العلوم "
اللي يغش مايطلعش كويس على الأقل قدام نفسه حتى لو كان قدام الناس كويس
يبقى هو كده خسر احترامه لنفسه زي ماحصل مع واحد صاحبي في امتحان الثانوية
العامة في مادة الإحصاء و الاقتصاد كان كاتب الامتحان كله على الدسك

و المراقب قاله تعال اقعد في مكان تاني قالو لا أن رقم جلوسي هنا مش هغير مكاني وكان في موقف محرج جداً وضع نفسه فيه"

ويضيف مصطفى محمود 3 كيمياء حشرات كلية علوم:
"اللي احنا شايفينوه ده نتيجة غش في المراحل التعليمية السابقة و بالتالي
بيطلع ناس لا تعتمد على نفسها وأنا كان حصل معايا موقف غريب أووي في
الثانوية العامة كان في واحد قاعد قدامي و عايزني اغششه و أنا كنت عايز
احل فغششته نص السؤال صح و النص الباقي غلط !!!مش معقول أديله مجهودي وأنا كنت بكتب بقلم اسود و المراقب أم قايل محدش يكتب غير بالأزرق فبعد الامتحان الولد ده قالي احسن ربنا بيعقبك علشان غششتني غلط". ومحمود كلية الحقوق " مرة دخلت الامتحان انا وواحد صاحبي و كان معانا الكتاب و كتبنا منه و جبنا في المادة دي 2 من 20 "

ويقول أسامة محمد السيد كلية علوم : "لا طبعا... هو بيضر نفسه فهو بيخلي نفسه في مستوى لا يستحقه و احنا دلوقتي بنعاني من انه ناس متخرجه من كليات عليا و ما بتعملش حاجه".






نصائح أغلى من الذهب



"لا
تعتمد على الغش ذاكر واعمل اللي عليك و الباقي على ربنا" ، " إن الله لا
يضيع أجر من احسن عملا" ، " غير في نفسك هتلاقي الدنيا اتغيرت وبلاش غش "
، " حل اللي عندك و ربنا هيوفقك وانسى الغش خالص"،
" شدوا حيلكم و ذاكروا كويس وسيبكم من الغش" ، " أكثروا من الدعاء *أمن
يجيب المضطر إذا دعاه*" ، " إن الله يحب إذا عمل أحدكم عملا أن يتقنه
فأتقنوا عملكم و ذاكروا كويس"

كانت هذه هي أجمل النصائح التي وجهها كل من سامح نبيل تجارة ، علي حليم 2 طب أسنان ، أحمد حامد 3 تجارة، أسامة محمد كلية علوم ، أحمد نصر 3 تجارة وأخيراً عامر محمود تجارة



ها بعد كل اللي سمعناه فاضل أنت إيه رأيك هل ما زلت عند رأيك في موضوع الغش ولا غيرت رأيك أيا كان رأيك قبل كده مش ده موضوعنا بس عايزين تعليقاتك دلوقتى ، أنت ممكن تغش بس زي ما عرفنا هتكون عصيت ربك و خسرت نفسك وضيعت وقتك ورغم كده ما جبتش التقدير اللي أنت عايزه .



خلي بالك ....

ذاكر ....تنجح وتتفوق كمان ، غش تجيب..


مش هاتجيب تقدير

الغش ليه صور واشكال كتير مش بس فى الامتحان لا ده فى البيع والشرا
وفى الزواج و فى النصيحه وفى الرعيه



تعريف الغش
قال المناوي: ( الغش ما يخلط من الرديء بالجيد ).
وقال ابن حجر الهيثمي: ( الغش المحرم أن يعلم ذو السلعة من نحو
بائع أو مشتر فيها شيئاً لو اطلع عليه مريد أخذها ما أخذ بذلك المقابل ).
وقال الكفوي: ( الغش سواد القلب، وعبوس الوجه، ولذا يطلق الغش على الغل والحقد ).




مضار الغش
من مضار الغش:
1- الغش طريق موصل إلى النار.
2- دليل على دناءة النفس وخبثها، فلا يفعله إلا كل دنيء نفس هانت عليه فأوردها مورد الهلاك والعطب.
3- البعد عن الله وعن الناس.
4- أنه طريق لحرمان إجابة الدعاء.
5- أنه طريق لحرمان البركة في المال والعمر.
6- أنه دليل على نقص الإيمان.
7- أنه سبب في تسلط الظلمة والكفار، قال ابن حجر الهيثمي: ( ولهذه
القبائح ـ أي الغش ـ التي ارتكبها التجار والمتسببون وأرباب الحرف
والبضائع سلط الله عليهم الظلمة فأخذوا أموالهم، وهتكوا حريمهم، بل وسلط
عليهم الكفار فأسروهم واستعبدوهم، وأذاقوهم العذاب والهوان ألواناً.
وكثرة تسلط الكفار على المسلمين بالأسر والنهب، وأخذ الأموال
والحريم، إنما حدث في هذه الأزمنة المتأخرة لما أحدث التجار وغيرهم قبائح
ذلك الغش الكثيرة والمتنوعة، وعظائم تلك الجنايات والمخادعات والتحايلات
الباطلة، على أخذ أموال الناس بأي طريق قدروا عليها، لا يراقبون الله
المطلع عليهم ) أ هـ.

والله موضوعيك هايل ياكنزى .. وكان المفروض يعنى من وجهة نظرى الشخصية

اننا نقول ذاكر تنجح علشان تقعد فى البيت

شكرا على موضوعيك وتسلم ايديك